Եվրոպական խորհրդարանում բացվեց Սերգեյ Փարաջանովի 100-ամյակին նվիրված ցուցահանդեսը

12 նոյեմբերի, 2024

Նոյեմբերի 12-ին Եվրոպական խորհրդարանում պատգամավոր Մարկետա Գրեգորովայի հովանավորությամբ տեղի ունեցավ Սերգեյ Փարաջանովի 100-ամյակին նվիրված ցուցահանդեսի բացման արարողությունը։ Ցուցահանդեսը համակազմակերպվել է ԵՄ-ում Հայաստանի և Ուկրաինայի ներկայացուցչությունների կողմից։

Բացման ելույթներով հանդես եկան պատգամավոր Մարկետա Գրեգորովան, Բրյուսելում ՀՀ դեսպան Տիգրան Բալայանը և Ուկրաինայի ներկայացուցչության ղեկավար Վսեվոլոդ Չենցովի անունից փոխդեսպան Օքսանա Դիակունը։

Մարկետա Գրեգորովան նշեց իր խոսքում, որ անչափ ուրախ է հյուրընկալել երկու դեսպանություններին և ներկայացնել Խորհրդարանի ուշադրությանը նման հետաքրքիր արվեստագետի և անհատականության, որը հաճախ չհասկացված է, սակայն խոսում է համամարդկային լեզվով։

Դեսպան Տիգրան Բալայանն իր երախտագիտության խոսքերն ուղղեց Կանաչների խմբակցությանը, մասնավորապես՝ Եվրոպական խորհրդարանի անդամ Մարկետա Գրեգորովային և ԵՄ-ում Ուկրաինայի ներկայացուցչությանը՝ Սերգեյ Փարաջանովի 100-ամյակին նվիրված ցուցահանդեսը խորհրդարանում կազմակերպելու նախաձեռնությանն աջակցելու համար։ Շնորհակալություն հայտնեց Երևանում Փարաջանովի տուն թանգարանին և ՀՀ կրթության, գիտության, մշակույթի և սպորտի նախարարությանը՝ ցուցահանդեսի նմուշները տրամադրելու համար։ Առաձնահատուկ ընդգծեց, որ Հայաստանի նախաձեռնությամբ ՅՈՒՆԵՍԿՕ-ն Սերգեյ Փարաջանովի ծննդյան 100-ամյա հոբելյանը ներառել է Հռչակավոր մարդկանց և կարևոր իրադարձությունների և հոբելյանների 2024-2025 թվականների օրացույցում, ինչպես նաև Ուկրաինայի նախագահը մեծն վարպետ Փարաջանովին պարգևատրել է «Ուկրաինայի ազգային լեգենդ» մրցանակով։

Իր ելույթի վերջում դեսպան Բալայանն ընդգծեց Փարաջանովի մեծ ավանդը և դերը մշակույթի և արվեստի զարգացման գործում, և վստահություն հայտնեց, որ Խորհրդարանը հնարովորություն կունենա վայելելու Փարաջանովի ստեղծագործությունները գալիք օրերի ընթացքում։

Օքսանա Դիակունը՝ ընթերցելով դեսպան Վսեվոլոդ Չենցովի ուղերձը շնորհակալություն հայտնեց պատգամավոր Մարկետա Գրեցորովային՝ ցուցահանդեսը հովանավորելու և Հայաստանի ներկայացուցչությանը նման նախաձեռնությամբ հանդես գալու համար։ Ընդգծեց արվեստի ուժը, որը միավորում է բոլոր մարդկանց աշխարհի յուրաքանչյուր անկյունից։

Ցուցահանդեսի բացմանը հաջորդեց ընրունելություն։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր