Դեսպան Բալայանը մասնակցեց Հայաստան-ԵՄ քաղաքացիական հասարակության հարթակի 9-րդ հանդիպմանը

10 նոյեմբերի, 2026

Նոյեմբերի 10-ին դեսպան Տիգրան Բալայանը որպես հիմնական բանախոս մասնակցեց Հայաստան-ԵՄ քաղաքացիական հասարակության հարթակի 9-րդ հանդիպմանը։ Իր խոսքում դեսպանն անդրադարձավ Հայաստան-ԵՄ հարաբերությունների զարգացման դրական դինամիկային, Համապարփակ և ընդլայնված գործընկերության համաձայնագրի, Հայաստան-ԵՄ գործընկերության ռազմավարական օրակարգի իրականացման առանցքային նշանակությանը, համագործակցության հետագա զարգացման հեռանկարներին և այդ համատեքստում քաղաքացիական հասարակության կարևոր դերակատարմանը։

Կարևորելով Համապարփակ և ընդլայնված գործընկերության համաձայնագրի հիմնարար նշանակությունը Հայաստան-ԵՄ հարաբերությունների զարգացման գործում՝ դեսպանն ընդգծեց, որ երկկողմ հարաբերություններն այսօր զարգացման այնպիսի փուլի են հասել, որ գերազանցել են Համաձայնագրով ի սկզբանե նախատեսված համագործակցության շրջանակը։

Դեսպանը նշեց, որ եթե նախկինում համագործակցության բարձրագույն ինստիտուցիոնալ ձևաչափը Գործընկերության խորհուրդն էր, ապա այսօր արդեն կայացել է Հայաստան-ԵՄ պատմական առաջին գագաթաժողովը և աշխատանքներ են տարվում հաջորդ գագաթաժողովի նախապատրաստման ուղղությամբ՝ առավել հավակնոտ օրակարգով։

Համագործակցության նոր առաջնահերթությունների հետ մեկտեղ անհրաժեշտ է ապահովել նաև ՀԸԳՀ-ով ստանձնած երկկողմ պարտավորությունների և Հայաստան-ԵՄ գործընկերության ռազմավարական օրակարգի լիարժեք և հետևողական իրականացումը։

Համագործակցության նոր առաջնահերթությունների շարքում դեսպանն առանձնացրեց Հայաստանի բնակչության համար կարևոր մի շարք ոլորտներում առաջընթացը։

Դեսպանն ընդգծեց Հայաստան-ԵՄ հարաբերությունների զարգացման աննախադեպ արագությունը, որպես կարևոր ձեռքբերում առանձնացնելով Հայաստանի նկատմամբ ԵՄ առևտրային ինքնավար միջոցների կիրառումը, որը նոր հնարավորություն է ստեղծում հայաստանյան արտադրողների համար։ Այս համատեքստում կարևորեց հայաստանյան բիզնեսի և արտադրողների ակտիվ ներգրավվածությունը եվրոպական շուկայում՝ նշելով, որ անհրաժեշտ է առավել մեծ ջանքեր գործադրել եվրոպական շուկայի պահանջներին համապատասխանելու և այդ շուկայում իրենց ներկայությունն ընդլայնելու ուղղությամբ։

Դեսպան Բալայանը կարևորեց նաև քաղաքացիական հասարակության դերակատարումը՝ Հայաստան-ԵՄ համագործակցության ընձեռած հնարավորությունների առաջմղման համատեքստում։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր